Əhalisi

Rayon əhalisinin sayı 85201 (01 yanvar 2023) nəfərdir. Əhalinin 42375 nəfəri və ya 49,73 faizi kişi, 25933 nəfəri və ya 30,43  faizi gənclərdir. 2019-cu il əhalinin siyahıyaalınması üzrə məlumatlara əsasən əhalinin 76,57 faizini azərbaycanlılar, 23,32 faizini talışlar, qalanını isə digər millətlərin nümayəndələri təşkil edir.
Əhalinin 10,12 %-i şəhərdə, 89,88 %-i kəndlərdə yaşayır. Rayon üzrə əhalinin orta sıxlığı 1 kvadratmetrdə 80 nəfər, şəhərdə isə 1 kvadratmetrdə 79 nəfərdir.
Əhalinin ümumi sayından 24,35 faizi 0-14 yaşda olan uşaq və yeniyetmələr, 70,27 faizi əmək qabiliyyətli yaşda, 5,38 faizi isə əmək qabiliyyətli yaşdan yuxarı olanlardır.

Lerik rayonu üzrə iqtisadi fəal əhalinin sayı 43938 nəfərdir ki, bu da əmək qabiliyyətli əhalinin 79.4 %-i deməkdir. Məşğul əhalinin sayı 41327 nəfərdir. Bunun 23.2 min nəfəri (56,2%) kənd təsərrüfatı, meşə təsərrüfatı və balıqçılıqda, 0,1 min nəfəri (0,2%) mədənçıxarma sənayesində, 0,8 min nəfəri (1,9%) emal sənayesində, 0,1 min nəfəri (0,2%) elektrik enerjisi, qaz və buxar istehsalı, bölüşdürülməsi və emalı sahəsində, 0,1 min nəfəri (0,2%) su təchizatı, tullantıların təmizlənməsi və emalı sahəsində, 2,4 min  nəfəri (5,8%) tikintidə, 4,4 min nəfəri (10,7%) ticarət, nəqliyyat vasitələrinin təmiri sahəsində, 0,7 min nəfəri (1,7%) nəqliyyat və anbar təsərrüfatında, 1,0 min (2,4%) nəfəri turistlərin yerləşdirilməsi və ictimai iaşədə, 0,2 min nəfəri (0,5%) informasiya və rabitədə, 0,1 min nəfəri (0,2%) maliyyə və sığorta fəaliyyəti sahəsində, 0,1 min nəfəri (0,2%) daşınmaz əmlakla əlaqədar əməliyyatlar sahəsində, 0,1 min nəfər (0,2%) peşə, elm və texniki fəaliyyət sahəsində, 0,4 min nəfər (1,0%) inzibati və yardımçı xidmətlərin göstərilməsi sahəsində, 2,0 min nəfəri (4,8%) dövlət idarəetmə və müdafiə, sosial təminat sahəsində, 3,4 min nəfər (8,2%) təhsil sahəsində, 0,8 min nəfər (1.9%) əhaliyə səhiyyə və sosial xidmətlərin göstərilməsi sahəsində, 0,7 min nəfər (1,7%) istirahət, əyləncə və incəsənət sahəsində (fəaliyyət), 0,7 min nəfər (1,7%) digər sahələrdə xidmətlərin göstərilməsində çalışır.

Dağlıq Qarabağ savaşında Lerik rayonu 130-dan çox şəhid verib. Onların 5-i şücaətlərinə görə Milli Qəhrəman adına layiq görülüblər. Azərbaycanın ilk Milli Qəhrəmanları sırasında da leriklilərin adı var. Rayonda hazırda 80 nəfər Qarabağ əlili var.

Lerik həmişə uzunömürlülər diyarı kimi məşhur olmuşdur. Bu rayonun sakini olmuş Şirəli Müslümov uzunömürlülük üzrə dünya rekordu müəyyən etmişdir. O, 168 il (1805-1973) ömür sürmüşdür. Onun digər həmyerlisi Məcid Aĝayev 138 il (1835-1973) və Mahmud Eyvazov isə 150 il (1808-1958) yaşamışdır. Hazırda bu rayonda yaşı 100-ü keçmiş, lakin hələ də əmək qabiliyyətini saxlamış onlarca insan yaşayır. Səyyah, etnoqraf-tarixçi Berezin qeyd edir ki, "buranın yerli əhalisi çox qədim xalqdır".