Şəhid Valeh İbrahimovun 50 illiyinə həsr olunmuş anım tədbiri keçirilib
2023-cü il oktyabrın 3-də Valeh İbrahimov adına Lerik şəhər inteqrasiya təlimli internat tipli gimnaziyasında şəhid Valeh İbrahimovun 50 illiyinə həsr olunmuş anım tədbiri keçirilib.
Tədbir iştirakçıları şəhidin məzarını ziyarət edərək üzərinə gül dəstələri düzüb əziz xatirəsini ehtiramla yad ediblər.
Öncə tədbirdə Azərbaycan Respublikasının müstəqilliyi və ərazi bütövlüyü uğrunda həlak olmuş şəhidlərin xatirəsi birdəqiqəlik sükutla yad edilib.
Tədbirdə Hüsaməddin Abbasov şəhidin həyatı və döyüş yolu haqqında məlumat verilərək bildirilib ki, Valeh İbrahimov 1973-cü il oktyabrın 4-də Lerik şəhərində anadan olmuşdur. Təhsil aldığı 2 saylı orta məktəbi bitirdikdən sonra 1991-ci ildə Lerik Rayon Hərbi Komissarlığı tərəfindən həqiqi hərbi xidmətə çağırılaraq Qarabağ cəbhəsinə yola salınmışdır. O, bir çox uğurlu döyüş əməliyyatlarında iştirak edərək qəhrəmanlıq göstərmişdir. Döyüşçü dostlarının dediyinə görə, Valeh ölümlə üz-üzə gəlməkdən heç vaxt qorxmaz, hər döyüşdə sərrast atəşləri ilə düşmənin çoxsaylı canlı qüvvəsini məhv edər, dostlarını qələbəyə ruhlandırarmış. Qəlbi Vətən sevgisi ilə döyünən Valeh İbrahimov 1994-cü il yanvarın 12-də düşmən gülləsinə tuş gələrək qəhrəmancasına şəhid olmuşdur.
Lerik Rayon İcra Hakimiyyətinin başçısı Əkbər Abbasov çıxış edərək, Birinci Qarabağ müharibəsində, Aprel döyüşlərində, Vətən müharibəsində, eləcə də son antiterror əməliyyatlarında Lerik rayonundan olan qəhrəman oğullarımızın da misilsiz rəşadət nümayiş etdirdiyini, “Azərbaycanın Milli Qəhrəmanı” və “Vətən Müharibəsi Qəhrəmanı” adları verilmiş, müxtəlif orden və medallarla təltif edilmiş hərbi qulluqçuların sırasında leriklilərin də adlarının olduğunu, qəhrəman şəhidlərimizin xatirəsinin daim ehtiramla yad edildiyini, şəhidlərimizin həyatı və keçdiyi döyüş yolunun həmişə təbliğ olunduğunu bildirib.
Tədbirdə şəhidin vaxtilə təhsil aldığı Lerik şəhər 2 saylı tam orta məktəbinin müəllimi Hacırza Quliyev, şəhid Valeh İbrahimovun sinif yoldaşları Natiq İsaqov və Həmid İmanov, şəhidin döyüş yoldaşı Veysəl Məlikov, Valeh İbrahimov adına Lerik şəhər inteqrasiya təlimli internat tipli gimnaziyasının direktoru Tehran Höccətov çıxış edərək, hər bir şəhidimizin xatirəsinin xalqımız üçün əziz olduğunu, şəhidlərimizin qəhrəmanlığının, şücaətinin, fədakarlığının hər bir azərbaycanlı üçün daim bir örnək olacağını vurğulayıblar.
Şəhid Valeh İbrahimovun qardaşı Vaqif İbrahimov şəhidin xatirəsinin yad edilməsinə görə ailə üzvləri adından minnətdarlığını bildirib.
Şagirdlərin ifasında ədəbi-bədii kompozisiyadan sonra şəhid Valeh İbrahimovun xatirəsinə həsr olunmuş şahmat turnirinin və intellektual yarışın qalibləri mükafatlandırılıblar.
