“Şahin” hərbi-idman oyununun final mərhələsində yüksək nəticə göstərmiş rayon komandasının üzvləri ilə görüş keçirildi
“Şahin” hərbi-idman oyununun 2022-ci il mayın 9-10-da Bakı şəhərində keçirilmiş final mərhələsində yüksək nəticə göstərmiş Valeh İbrahimov adına Lerik şəhər inteqrasiya təlimli internat tipli gimnaziyasının rayonu təmsil edən “Şahinlər” komandasının üzvləri ilə Lerik Rayon İcra Hakimiyyətində görüş keçirildi.
Hərbi-idman oyunları haqqında məlumat verən Lerik Rayon Gənclər və İdman İdarəsinin rəisi Natiq İsaqov ənənəvi olaraq hər il keçirilən “Şahin” hərbi-idman oyununun yeniyetmə və gənclərin hərbi-vətənpərvərlik tərbiyəsində müstəsna rol oynadığını, məktəblilərin hərbi-idman oyunlarına cəlb edilməsinin onların ordu sıralarında xidmətə hazırlanmasına kömək məqsədi daşıdığını bildirdi. Valeh İbrahimov adına Lerik şəhər inteqrasiya təlimli internat tipli gimnaziyasının rayonu təmsil edən “Şahinlər” komandasının Cəlilabad şəhərində keçirilmiş zona mərhələsində II yeri tutaraq respublika final mərhələsinə vəsiqə qazandığı, 2022-ci il mayın 9-10-da Bakı şəhərində keçirilmiş final mərhələsində yüksək nəticə göstərdiyi, “Maneələrin dəf olunması” mərhələsi üzrə 1-ci yeri tutduğu, Azərbaycan Respublikası Gənclər və İdman Nazirliyinin fəxri fərmanına layiq görüldüyü qeyd edildi.
Lerik Rayon İcra Hakimiyyəti başçısının səlahiyyətlərini icra edən Cəlil Baxşıyev “Şahin” hərbi-idman oyununun respublika final mərhələsində yüksək nəticə göstərmiş Valeh İbrahimov adına Lerik şəhər inteqrasiya təlimli internat tipli gimnaziyasının rayonu təmsil edən “Şahinlər” komandasını təbrik etdi, bu nailiyyətdə əməyi olan hər kəsə təşəkkürünü çatdırdı. Bildirdi ki, Prezident, Ali Baş Komandan cənab İlham Əliyevin gənclərin vətənpərvərlik ruhunda tərbiyə edilməsi istiqamətində qarşıya qoyduğu vəzifələrin uğurlu icrasının, ordu quruculuğuna göstərdiyi xüsusi qayğı və diqqətin nəticəsidir ki, son illərdə yeniyetmə və gənclər arasında ordu sıralarında xidmət etməyə həvəs daha da artmışdır. “Şahin” hərbi-idman oyunlarının da keçirilməsində başlıca məqsəd böyüməkdə olan gənc nəslin hərbi-vətənpərvərlik tərbiyəsini daha da yüksəltmək, şagirdlərin gələcəkdə ordu sıralarında xidmətə hazırlanmasına kömək göstərməkdən ibarətdir.
Görüşdə iştirak edən Azərbaycan Respublikası Milli Məclisinin deputatı İqbal Məmmədov “Şahin” hərbi-idman oyununun respublika final mərhələsində yüksək nəticə göstərmiş rayonu təmsil edən komandanın üzvlərini təbrik etdi, yeniyetmə və gənclərin vətənpərvərlik tərbiyəsində hərbi-idman oyunlarının yerinin və rolunun əvəzsiz olduğunu vurğuladı.
Tədbirdə çıxış edən “Şahinlər” komandasının üzvləri rayon icra hakimiyyətinin rəhbərliyi tərəfindən bu görüşlərin təşkil edilməsinə, göstərilən diqqət və qayğıya görə minnətdarlığını ifadə etdilər.
Qalib komandanın üzvlərinə rayon icra hakimiyyətinin fəxri fərmanları təqdim edildi.
