Lerikdə “Aqrar Biznes Festivalı” keçirilib
27 noyabr 2024-cü il tarixində Lerik rayonunda Kənd Təsərrüfatı Nazirliyinin Aqrar İnnovasiya Mərkəzinin təşkilatçılığı ilə Aqrar Biznes Festivalı keçirilib.
Tədbirdə Lerik Rayon İcra Hakimiyyətinin başçısı Əkbər Abbasov, Aqrar İnnovasiya Mərkəzinin direktoru Anar Cəfərov, Azərbaycan Respublikası Sahibkarlar Təşkilatları Milli Konfederasiyasının vitse-prezidenti Jalə Hacıyeva və fermerlər iştirak ediblər
Lerik Rayon Mədəniyyət Mərkəzinin qarşısındakı meydanda keçirilən festivalda fermerləri maraqlandıran müxtəlif kənd təsərrüfatı təyinatlı məhsullar nümayiş olunub, müxtəlif qurumların mütəxəssisləri dövlət və özəl sektorun əməkdaşlığı çərçivəsində fermer və sahibkarlara göstərilən dəstək barədə məlumat veriblər.
Festivalda çıxış edən Lerik Rayon İcra Hakimiyyətinin başçısı Əkbər Abbasov ölkənin bütün regionlarında olduğu kimi Lerik rayonunda da kənd təsərrüfatının inkişafına mühüm diqqət yetirildiyi və bu tipli tədbirlərin təqdirəlayiq olduğunu diqqətə çatdırıb.
Həmçinin rayon rəhbər fermerlərin maarifləndirilməsi istiqamətində rayonda keçirilən bu cür tədbirlərin əhəmiyyəti və aqrar sahəyə öz töhfəsini verəcəyini vurğulayıb.
Aqrar İnnovasiya Mərkəzinin direktoru Anar Cəfərov bölgələrdə keçirilən Aqrar Biznes Festivallarının əsas məqsədinin regionlarda yaşayan fermerlərin kənd təsərrüfatı məhsul və texnologiyalara əlçatanlığının təmin edilməsi olduğunu bildirib. Fermerlərin aqrar innovasiyalara və maliyyə mənbələrinə çıxışını əlçatan edən bu festivallarda əməkdaşlıq imkanlarının geniş olduğunu vurğulayıb.
Daha sonra Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının vitse-prezidenti Jalə Hacıyeva çıxış edərək bu sahədə olan yeniliklərlə tanış olmaq, istehsalçılarla birbaşa əlaqə qurmaq, təcrübə mübadiləsi aparmaq imkanı baxımından bölgələrdə keçirilən bu tədbirlərin fermerlər, eyni zamanda sahibkarlar üçün əhəmiyyətli olduğunu qeyd edib.
Həmçinin festival çərçivəsində fermerlərə aqrar sahənin prioritet istiqamətlərinə uyğun olaraq təlim də keçirlib.
Sərgi bölməsində müxtəlif kənd təsərrüfatı təyinatlı məhsullar, bitki mühafizə vasitələri, müxtəlif bitki və tərəvəz toxumları nümayiş olunub.
