Piran kəndində Vətən Müharibəsidə şəhid olan lerikli qəhrəmanlarımızın şəkillərindən ibarət abidə kompleksinin açılışı oldu

28 mart 2022-ci il tarixdə Piran kəndində Vətən Müharibəsi şəhidi gizir Cabbarov Vidadi Cəbrayıl oğlunun doğum günü ilə əlaqədar şəhidin atasının təşəbbüsü ilə inşa edilmiş Vətən Müharibəsidə şəhid olan lerikli qəhrəmanlarımızın şəkillərindən ibarət abidə kompleksinin açılışı oldu. 
Açılışda Lerik Rayon İcra Hakimiyyəti başçısının səlahiyyətlərini icra edən Cəlil Baxşıyev, Milli Məclisin deputatı İqbal Məmmədov, şəhid ailələri, qazilər və ictimaiyyət nümayəndələri iştirak edirdilər.
Öncə tədbir iştirakçıları abidə kompleksinin önünə gül-çiçək dəstələri düzərək ehtiramlarını bildirdilər.
Tədbirdə Lerik Rayon İcra Hakimiyyəti başçısının səlahiyyətlərini icra edən Cəlil Baxşıyev çıxış edərək bildirdi ki, torpaqlarımızın işğaldan azad edilməsi uğrunda gedən döyüşlərdə şəhid olmuş qəhrəman Vətən övladlarının əziz xatirəsi həmişə ehtiramla yad edilir, onların keçdiyi döyüş yolu bir nümunə kimi təbliğ olunur.
Vətən müharibəsində Lerik rayonundan olan qəhrəman oğullarımız da Prezident, Silahlı Qüvvələrin Ali Baş Komandanı cənab İlham Əliyevin rəhbərliyi altında hərbi əməliyyatlarda misilsiz rəşadət nümayiş etdirdilər və öz qanları bahasına Vətən torpaqlarını azad etdilər. Möhtəşəm qələbənin əldə edilməsində leriklilərin də imzası vardır. Şəhid gizir Cabbarov Vidadi Cəbrayıl oğlu da belə qəhrəman oğullarımızdan biridir. Şəhidlərimizin qəhrəmanlığı, şücaəti, fədakarlığı hər bir azərbaycanlı üçün daim bir örnək olacaqdır.
Tədbirdə Milli Məclisin deputatı İqbal Məmmədov, şəhid ailə üzvləri, şəhidin döyüş yoldaşları və  digərləri çıxış edərək şəhidlərə göstərilən ehtirama, şəhid ailələrinə, qazi və Vətən müharibəsi iştirakçılarına göstərilən diqqət və qayğıya görə ölkə Prezidenti cənab İlham Əliyevə və birinci vitse-prezident Mehriban xanım Əliyevaya  səmimi minnətdarlıqlarını bildirdilər.