Piran kənd körpələr evi-uşaq bağçası istifadəyə verildi
16 sentyabr 2020-ci il tarixdə yeni tədris ilinin başlanması ilə əlaqədar Heydər Əliyev Fondu tərəfindən yeni inşa edilən 60 uşaq yerlik Piran kənd körpələr evi-uşaq bağçası istifadəyə verildi.
Kənddə fəaliyyət göstərmiş uşaq bağçası 1985-ci ildə kolxoz üçün inşa olunmuş, sonradan bir hissəsində Piran kənd ərazi icra nümayəndəliyi yerləşmiş binada 1989-cu ildən fəaliyyətə başlayıb. Bina ötən müddətdə istifadəyə yararsız vəziyyətə düşüb.
Heydər Əliyev Fondu tərəfindən kənddə yeni körpələr evi-uşaq bağçasının inşasına 2019-cu ilin sonlarında başlanılıb. Tikinti işləri 2020-ci ilin avqust ayında yekunlaşdırılıb.
İkimərtəbəli, 60 yerlik körpələr evi-uşaq bağçasında yataq və oyun otaqları, idman və musiqi zalları, mətbəx, yeməkxana, anbar, tibb otağı, camaşırxana və digər inzibati və texniki otaqlar mövcuddur.
Müəssisə zəruri mebel və avadanlıqlarla tam təchiz edilib.
Bağçanın həyətyanı ərazisində yenidənqurma və yaşıllaşdırma işləri aparılıb, dekorativ kol və ağaclar əkilib, uşaq əyləncə qurğuları, söhbətgahlar quraşdırılıb.
