Lerikdə yeni yaşayış binası istifadəyə verildi

30 dekabr 2019-cu il tarixdə Lerik rayonunda inşa edilmiş yeni 48 mənzilli binanın açılış mərasimi keçirildi. Açılış mərasimində rayon icra hakimiyyətinin başçısı Rövşən Bağırov, icra hakimiyyəti yanında mənzil komissiyasının  üzvləri, ictimaiyyət nümayəndələri və mənzil sahibləri iştirak edirdilər.
Tədbirdə çıxış edən rayon icra hakimiyyətinin başçısı Rövşən Bağırov bildirdi ki, bu gün doğrudan da hər biriniz üçün bayramdır, unudulmaz, xoşbəxt bir gündür. Hamı kimi biz də sevinirik ki, vətəndaşlarımız köhnə, şəraitsiz evlərdən belə yaraşıqlı, hər cür kommunal şəraiti olan yeni mənzillərə köçür, arzularına qovuşurlar. Dünyanın inkişaf etmiş heç bir ölkələrində belə, vətəndaşlara dövlət hesabına, təmənnasız evlər verilmir. Ancaq cənab Prezidentimiz yüksək humanistlik göstərərək, nəinki imtiyazlı şəxslərə, hətta adi vətəndaşların mənzil şəraitinin yaxşılaşdırılması üçün qərarlar qəbul edir, sərəncamlar verir.  Biz bu gün belə bir sərəncamın bariz nümunəsini görürük.
Sonra rayon icra hakimiyyətinin başçısı binanın sakinlərinə orderləri təqdim etdi və onları həm yeni mənzil almaları, həm də qarşıdan gələn bayramlar münasibəti ilə təbrik etdi. Yeni mənzillərində xoşbəxt, firavan yaşamalarını arzuladı. 
Sonda natiq çıxışında rayonumuza göstərdiyi xüsusi diqqət və qayğıya görə  Prezidentimiz cənab İlham Əliyevə minnətdarlığını bildirdi, dövlətimizin daha güclü olması hər zaman ölkə rəhbərinə dəstək olmalı, ətrafında sıx birləşməli, birlik nümayiş etdirərək müstəqil dövlətimizin tərəqqisi və inkişafına töhfələrimizi verməli olduğumuzu qeyd etdi.
Yeni binada mənzilə sahib olan sakinlərdən Zülfiyyə Nəsirova, Sevil Ağayeva, Mahirə Məmmədova və başqaları çıxış edərək bu soyuq qış günündə onlara isti mənzillər hədiyyə etdiyinə, köhnə, şəraitsiz evlərinin əvəzində bütün kommunal xidmətlərlə əhatə olunmuş yaraşıqlı mənzillərlə təmin olunduqlarına görə Prezident cənab İlham Əliyevə sonsuz məhəbbətlərini bildirərək, minnətdarlıqlarını bildirdilər.
Sonda icra başçısı Rövşən Bağırov sakinlərlə birlikdə yeni mənzillərə baş çəkdi və yeni mənzillərdə yaradılan şəraitlə tanış oldu.