“Ölkəmizi tanıyaq” tur-aksiyası çərçivəsində məktəblilərin Lerik şəhərindən təntənəli yola salınma mərasimi keçirildi

13 noyabr 2019-cu il tarixdə  Heydər Əliyev meydanında rayon icra hakimiyyəti başçısı Rövşən Bağırovun, rayon icra hakimiyyətinin məsul işçiləri, müəllimlər və valideynlərin iştirakı ilə “Ölkəmizi tanıyaq” layihəsi çərçivəsində təhsildə fərqlənən bir qrup məktəbli uşaqların Qəbələ - Şəki - Zaqatala rayonlarına təntənəli yolasalma mərasimi keçirildi.
Lerik rayonunun ümumtəhsil məktəblərinin öz təhsili və nümunəviliyi, ictimai həyatda fəallığı ilə fərqlənən 40 nəfər IX-XI sinif şagirdi və onları müşayiət edən bir neçə müəllim dörd gün ərzində tur-aksiyanın səfər proqramına uyğun olaraq Qəbələ - Şəki - Zaqatala şəhərlərinə səyahət edəcək, şəhərlərin tarix və mədəniyyət abidələri, görməli yerləri, sosial-iqtisadi inkişaf sahəsində qazanılan nailiyyətlərlə yaxından tanış olacaq, müxtəlif tədbirlərdə iştirak edəcəklər.
Aksiya iştirakçıları öncə Heydər Əliyev meydanında Ümummilli Lider Heydər Əliyevin abidəsini ziyarət edərək, abidənin önünə gül dəstələri qoydular.
Yolasalma mərasimində çıxış edən Lerik Rayon İcra Hakimiyyəti başçısı Rövşən Bağırov tur-aksiya iştirakçılarını salamladı və ölkəmizdə Prezident cənab İlham Əliyevin gənclərə diqqət və qayğısı, qəbul edilmiş dövlət proqramlarının icrası ilə əlaqədar uşaqların, yeniyetmə və gənclərin hərtərəfli inkişafına xidmət edən müxtəlif layihələrin həyata keçirildiyini vurğuladı. Cənab Prezidentin tapşırığına uyğun olaraq ildə iki dəfə “Ölkəmizi tanıyaq” layihəsi üzrə ümumtəhsil məktəblərinin şagirdlərinin respublikanın ayrı-ayrı bölgələrinə tur-aksiyaları təşkil olunduğunu qeyd etdi.
Bu gün rayonumuzun ümumtəhsil məktəblərində öz təhsili və nümunəviliyi, ictimai həyatda fəallığınız ilə seçilərək bu gün start götürəcək tur-aksiyanın 12-ci mərhələsi çərçivəsində dörd gün ərzində aksiyanın səfər proqramına uyğun olaraq Qəbələ - Şəki - Zaqatala şəhərlərinə səyahət turunda iştirak edəcəksiniz. Səfər edəcəyiniz şəhərlərin tarixi və mədəniyyət abidələri, görməli yerləri, sosial-iqtisadi inkişaf sahəsində qazanılan nailiyyətləri ilə yaxından tanış olacaqsınız. İnanıram ki, rayonumuzu layiqincə təmsil edəcək və müxtəlif intellektual oyunlarda iştirak etməklə öz bilik və bacarığınız nümayiş etdirəcəksiniz.
Daha sonra natiq bildirdi ki, regionların sosial-iqtisadi inkişafına dair Dövlət Proqramları respublikamızda o, cümlədən rayonumuzda da uğurla icra edilmişdir. Tur-aksiya çərçivəsində olduğunuz rayonlarda da bütün bunların əyani şahidi olacaqsınız və bunlar sizdə böyük maraq doğurmaqla yanaşı yaddaşınızda silinməz xatirələr qoyacaqdır.
Ölkəmizdə gənclərə göstərilən dövlət qayğısından, bu sahədə rayonda görülmüş işlər barədə danışan R.Bağırov məktəblilərin ölkəmizi daha yaxından tanıması üçün yaradılan bu şəraitə görə Azərbaycan Respublikasının Prezidentinə minnətdarlığını ifadə etdi. 
Sonda rayon icra hakimiyyətinin başçısı tur-aksiya iştirakçılarına tövsiyələrini bildirdi və yaxşı yol arzuladı.